中環出更：台灣幫開P 800名流撐場
台灣駐港機構由「中華旅行社」改為「台北經濟文化辦事處」，話咁快已經一周年，早前台灣幫喺金鐘萬豪酒店舉行周年派對，逾八百名城中政商名流熱烈撐場。東華三院主席陳文綺慧（Viola）、陽明山莊創辦人黃週旋新抱黃林碧瑢（Vanessa）、仁愛堂總理羅台秦等名媛亦亮相打氣。台北辦事處處長朱曦好有心思，準備咗香腸、滷肉飯等台灣小吃招呼賓客，甚有台灣特色。
Vanessa係食物回收機構「膳心連」嘅創辦人，佢開心報喜話，愈來愈多酒店及食肆願意捐助食物畀佢哋，連香港國際機場都打算加入。
黃太盼修例保障「膳心人」
不過，由於捐贈者及每日接受食物嘅人數愈來愈多，財政上開始覺得吃力，遲啲可能要舉行籌款活動。Vanessa又話，唔少跨國酒店集團原本想將食物捐畀佢哋，但又怕有人食壞肚，最終惹麻煩上身而卻步。外國有法例保障善心人士唔會惹事上身，香港應該修例跟上腳步。
卓妮轉頭又見到Viola，佢接任東華主席之後忙到瘦晒，有時一日趕五、六場，想肥都難。Viola透露，現正籌備於下半年推出公關策略創意比賽，為東華三院推廣整體品牌形象獻策。
前行政會議成員李業廣都以港台經濟文化合作協進會主席身份出席，佢話好鍾意台灣小吃，尤其係有「台灣漢堡」之稱嘅割包，令人回味無窮。
卓妮