旺角回收車 霸咪錶冇王管
「佢哋收罐同紙皮，倒到成地污糟水，又霸車位又霸行人路，真係好滋擾，但係又冇人管！」丁先生指旺角多處均有多部回收車「橫行」，並經常佔用咪錶位經營回收業務，不但阻塞道路，更令環境衞生每況愈下，雖曾多次投訴，但相關部門卻未有執法。
警方發言人表示，接獲投訴後已即時派員到場處理，並向有關人士發出警告及票控。根據法例，停泊在設有停車收費錶的泊車位如未繳費，車輛會被罰款三百二十元正。
不過，食物環境衞生署發言人卻稱有關問題不屬其負責範圍，未就事件作任何跟進。
當區區議員許德亮承認曾接獲大量居民投訴，指回收車佔用咪錶位經營回收生意，嚴重影響環境衞生，認為單靠警方以交通違例作檢控無助根治問題，「食環署絕對有責任執法，因為啲車唔單止長霸咪錶位，仲整污糟晒啲地方，又用貨車做買賣交易，根本就係非法擺賣，（食環署）唔可以推卸責任！」