董建華時代特區政府本來成立咗一個扶貧委員會，顧名思義就係扶助貧窮人士，由當時嘅財政司司長唐英年揸旗。可能因為唐唐有太多課外活動，顧得感情缺失又顧唔到地牢密室，無心裝載之下，扶貧委員會不了了之執笠大吉。
改朝換代狼來了，梁振英一做特首就宣布扶貧委員會鹹魚翻生，更加由梁特首親自打骰，估計最遲今年十月再次成立。既然死去活來，扶貧委員會2.0將會如何運作呢？籌備小組前日舉行咗第一次會議，委員會成員之一嘅關愛基金執委會主席羅致光透露，預料政府將整合扶貧委員會同關愛基金，並於未來兩個月諮詢社會意見。而另一成員新世界集團主席鄭家純就話嘞，希望透過商界參與，繼續發揚扶貧精神。
咦，一加一等於二，扶貧委員會同關愛基金整合整合，雙劍合璧會唔會產生協同效應嘅化學作用？功夫茶當然希望係咁啦，畀窮等人家有機會出生天吖嘛。之不過咁，歸納特區政府過往表現，好多時候係崇尚空談，講到頭頭是道，做到處處撞板。所以咯喎，整合扶貧與關愛未必一定勝利完成任務o架。
就攞關愛基金嚟講吖，呢家嘢係過氣特首曾蔭權未被貪腐醜聞纏身之前拍板嘅，構思極之簡單，目標善款一百億，政府出一半，商界出一半，十足十《歡樂滿東華》或者《星光熠熠耀保良》，煲呔曾負責做司儀抌心口，善長仁翁慷慨解囊，只不過捐完錢冇得上台獻唱走音名曲咁解。慈善版官商勾結嘅籌款金額一到手，關愛嘅對象係現有福利政策嘅漏網之魚，譬如冇申領綜援嘅窮光蛋，又譬如上網都冇錢嘅學生哥。
構思講完，實際運作又如何？截至今年六月為止，關愛基金得到承諾捐款大約十八億元，實收七億八千萬。換言之，關愛基金距離抌心口募捐五十億嘅目標仲好遙遠，落差之大，同財爺曾俊華經常計錯數不遑多讓。
即係咁，假如關愛基金繼續籌款乏力，善長仁翁撳住荷包唔肯共襄善舉，即使扶貧委員會同佢整合整合，最終可能都係一事無成。
梁振英成日都話要市民畀時間佢做嘢，計功夫茶話齋，不如掉轉頭要求梁特首爭取時間做嘢。喂，曾蔭權在位七年證明崇尚空談真係禍港殃民o架，如果新政府又係蹉跎歲月浪費青春，莫講話扶貧難以成事，隨時會有愈來愈多風流人物折墮到變窮鬼。
一句講晒，坐言起行，扶貧固然係咁，治港同樣係咁，千祈唔好再空談誤未來，人生冇幾多個七年o架咋！