本身係荷蘭人嘅公民黨（公文袋）南區區議員司馬文，早前有意參選九月立法會區議會超級議席，但就被公民黨基於佢仲未攞到中國護照為由拒絕。直到尋日就有新發展，就係司馬文終於正式放棄荷蘭國籍，佢今朝仲會去入境事務處領取入籍中國籍嘅證明。不過，據講公文袋依然唔畀佢參選，尋日一度傳出佢為參選退黨。
司馬文尋日傍晚同公文袋商討參選問題，據聞最後雙方有所讓步，大家有意再去傾個兩全其美嘅解決方法。不過，該黨黨魁梁家傑夜晚被問到司馬文退黨事件，就仍然有保留話：「畀啲時間操作吓啦，佢（司馬文）仲未攞到國籍喎！」咁即係會唔會勸退司馬文呢？梁家傑就再話：「畀啲時間操作吓啦，呢幾日會有決定o架喇。」但佢就堅決表明唔會換名單。
公文袋無派人選超級議席，但又唔畀司馬文出選，究竟當中有乜因由呢？莫非如傳聞話佢哋冇錢冇資源？如果司馬文自己出錢參選，佢哋又係咪批准呢？抑或如傳聞所講，佢哋已讓路畀白鴿黨參選呢？