政情：盛智文選擇唔多焗撐「人」？
尋日中午烈日當空，自由黨張宇人（Tommy）就拉埋近百個飲食業界代表到添馬公園宣布競逐連任立法會飲食界議席，其中蘭桂坊之父盛智文仲係Tommy嘅助選團團長之一。不過，盛智文就自爆將會提名新民黨主席葉劉淑儀出選港島區。咁同樣參選港島區嘅自由黨主席劉健儀呢？盛智文就聳聳肩話，係葉劉問佢攞提名先喎，唔通呢啲就係撐人唔撐黨？
盛智文尋日為Tommy站台好落力，問佢點解要支持Tommy，佢就笑笑口話，因為選擇唔多喎，但之後又兜番其實Tommy係有做嘢嘅。Tommy仲即場演出一場趣劇，快刀斬亂麻咁幫一個被經營困難五花大綁嘅同業剪晒啲煩惱，「最低工資三十五蚊」、「標準工時」字條隨即落下，業界睇到拍手叫好，但打工仔會畀幾多個「趣」就唔知喇。
自由黨尋日亦公布立法會參選名單，主席劉健儀將聯同邵家輝及李鎮強出選港島區，而榮譽主席田北俊就聯同「莎姐」周梁淑怡、梁志偉及廖國華出選新界東直選。至於功能界別方面，除咗Tommy出選飲食界外，方剛亦會競逐連任批發及零售界，而航運交通界就由易志明出選，紡織及製衣界就由鍾國斌出戰。