政情：工聯新招 當選唔准「兼職」
工聯會繼早前規定全部參選人退出民建聯，以示同呢個競爭對手劃清界線後，據聞仲有新招推出，就係規定工聯會新一屆立法會議員唔准兼任港區人大及政協職務。
絕緣人大政協
眾所周知，建制派人士一旦成功當選立法會議員，唔少都會獲中央延攬做港區人大代表或全國政協委員，以示對佢哋嘅肯定。不過，工聯會今屆決定反其道而行，所有當選立法會議員嘅人士，都唔准兼任上述中央職位，以示對立法會工作嘅重視同專注。
依家工聯會幾位立法會議員裏面，有人大或者政協職務嘅，暫時只得九龍東嘅黃國健係港區人大，如果佢成功連任嘅話，嚟緊就唔會參選下屆人大選舉喇。有工聯會人士就話，呢個決定係唔想選民覺得參選人有「後路」，換言之工聯會今次係許勝不許敗，希望藉此爭取選民支持咁話。