政情：劉健儀換硬肥仔明呢條「內褲」
今屆立法會會期尋日圓滿結束，內務委員會主席劉健儀（Miriam）就聯同內會副主席李華明（肥仔明）開記招總結立法會年度工作。可能係因為最後一日開會，議事廳內外氣氛輕鬆，Miriam更語出驚人，利用肥仔明內副（內褲）身份嚟開玩笑，仲話肥仔明呢條底褲一定要換，唔知佢係咪趁會期結束，覺得自己可以無拘束嚟個大解放呢？
搭住膊頭十足情侶
由於肥仔明宣布唔會再參選立法會，內會副主席一職就要重新選過。肥仔明尋日臨別秋波，用手搭住Miriam膊頭，十足情侶咁款，Miriam就搞笑話：「無論點都好，條內褲（內副）就一定要換！」肥仔明就即刻回敬話：「梗係啦，條底褲着咗好耐咁污糟！」雖然肥仔明鍾意搞笑係個不爭嘅事實，但素來穩重端莊嘅Miriam無理由要陪佢搞笑埋一份囉。
肥仔明仲品評任內三個政務司司長（CS），根據過去每星期同CS會面嘅觀感，覺得唐英年官威十足，好似乜都企喺政府立場出發，而林瑞麟就係第一個請佢同Miriam飲茶嘅人，至於上任十幾日嘅林鄭月娥仲同佢哋喺CS辦公室內合照添！