中環出更：張雅麗率千五姊妹北上
暑期到，交流團一浪接一浪。香港島婦女聯合會主席張雅麗（Carol），日前首次帶隊北上廣州，同廣東省婦聯班好姊妹聚吓，同行有成一千五百人，人數之多，破晒婦女組織北上交流嘅紀錄。
同行仲有首席會長陳妙蘭（Christina）、副主席趙華娟等，但副主席鄭詩韻及伍婉婷，因為公務繁多去唔到，但出發當日，晨早七點就去送車，認真唔話得。廣州熱到好似火爐咁，姐妹們出發前做足防曬工夫，帶齊迷你電風扇、太陽眼鏡同雨遮，萬無一失。
大擦地道農家菜
千五人浩浩蕩蕩由香港出發，團友喺旅遊巴上唱歌自娛，笑聲不絕。廣州美食多，一場嚟到，當然要把握機會大擦地道農家菜。入夜後，仲有文藝表演睇，欣賞吓歌舞同粵劇，開心到極。返到酒店後，團友們紛紛倒頭大睡，Christina因為怕一個人住，爭住要同Carol孖鋪瞓，認真搞笑。
卓妮