中環出更：霍啟文難得現身
中華出入口商會青年部等五大商會嘅青年才俊，早前齊集灣仔一間酒吧歡聚。霍英東集團行政總裁霍震寰嘅孻仔霍啟文亦現身同樂，佢已返港做嘢幾年，但係奉行低調，所以當日現身同城中企業界新世代打成一片，眾人把酒暢談兼且玩遊戲，相當難得。
今次聚會搞手係中出青年部主任李美辰，一齊共襄盛舉嘅仲有美辰老公香港青年聯會專業事務委員會主席蔡德昇、福建社團聯會青委常務副主任陳建鴻、中國企業協會青委主任陳沛良及香港僑界社團聯會青委副主任廖宇軒等人。
費詠詩自爆迷上太極
美辰精力無限，幾時見佢都忙到不得了。佢話由佢爸爸李宗德成立嘅和富社會企業，最近喺全港七十幾間中小學宣布成立「和富青少網絡」，為培養新一代領袖盡心盡力，小妮子服務社會嘅熱情，一啲都唔輸畀爸爸。
青聯常董蔡敏思、賢慧社秘書長費詠詩亦喺度。費詠詩自爆，最近同賢慧社主席羅詠詩等好姊妹迷上練太極，大家搵咗一位名師齊齊上堂，難怪一班靚女身形弗爆又健康。蔡敏思就趁七．一假期，同家人去咗台灣宜蘭浸溫泉，朝早親手擠新鮮牛奶飲，享受咗幾日回歸大自然嘅生活，玩到樂不思蜀添！
卓妮