吖，唔知係前朝遺禍呢，定係現屆政府一樣咁弱雞，教科書價格高企嘅問題，搞來搞去都搞唔掂，學生家長照舊要為沉重到痹嘅課本費用而煩惱。書到用時方恨少，書到買時呻家窮，不知係幾多莘莘學子嘅無奈心聲。
教育局真係好鬼死弱雞o架，你睇你睇，消費者委員會調查發現，教科書同教材分拆定價之後，書價未見下調，仍然錄得升幅，消委會深感失望咁話。
喂，前朝曾氏蔭權政府手下嘅教育局局長孫明揚拍晒心口，話分拆教材就可以令到課本減價，從而減輕家長負擔，呢一個咁美麗嘅承諾點解冇兌現嘅呢？部分教材已經分拆咗啦，因乜事幹售價不減反加？莫講話消委會深感失望，功夫茶都覺得極度遺憾，直情遺憾到想學伍子胥鞭屍囉。阿媽教落，講大話，甩大牙，分拆教材竟然冇出現萬眾期待嘅書價下調，唔知教育局袞袞諸公甩咗幾多隻大牙呢，呵？
消委會調查得到嘅實際數據係咁嘅，市面三十一家出版社九百四十四本教科書之中，有分拆教材嘅課本定價平均加價百分之零點八，未分拆嘅教科書平均加幅百分之四點二。小學用書有百分之五十四已分拆，已分拆課本嘅平均升幅係百分之零點六，未分拆升幅百分之四。中學用書之中，僅得百分之十四課本有分拆定價，分拆後嘅書價平均升幅百分之一點二，其餘未分拆嘅課本升幅係百分之四點二。
教材分拆仍然加價，係咪因為通貨膨脹？出版商當然係咁講啦，佢哋姓賴吖嘛，加價係由於租金、工資、印刷費、版權費同運輸成本增加咁話喎。之不過咁，根據消委會嘅講法，紙價同印刷費嘅變動與去年相若。
其實計功夫茶話齋，出版商之所以咁把炮話加就加，唔理你死人冧樓點都要加，原因來來去去得一個，咪就係教育局有姿勢冇實際囉，完全阻擋唔到書商飛擒大咬。前任局長孫明揚拍拍屁股落台走人，現任局長吳克儉又唔知有冇能力收拾爛攤子，受害嘅「大書家」始終係求學一族以及可憐爹媽。孫公未執包袱之前都識得講啦，家陣係一個書商壟斷嘅局面，明知係咁，點解唔諗辦法打破局面呢？局方係就係拋出一個電子教科書方案，企圖以課本電子化抗衡傳統出版商，之但係咁，呢個只係初步概念，距離實現仲有十萬八千里，遠水係冇辦法救近火嘅。再講吖，日後電子教科書出版商會唔會變成另一隻巧取豪奪嘅吸血怪獸，冇人知o架。
嗱，唔該吳克儉醒醒定定，新官上任聽講有三把火，一於同書商周旋到底，唔好繼續弱雞又甩牙咁難睇吖嘛！