歲月靜好，生活安穩，沒必要想起警察叔叔；又或者不為浮名絆此身，只愛「敢云大隱藏人海，且耐清寂讀我書」的，恐怕唔多需要除暴安良、剛毅勇敢的「男子漢」；當然，如果深信曾國藩「修身十二款」其中一款「夜不出門」嘅，則「警力於我何有哉」？
之不過，喜歡夜蒲嘅，無論是旺角黑夜，蘭桂坊午夜，都知道警察叔叔有神聖嘅作用！有專欄作者反映佢每周末都在中環喝酒，午夜後回家，在荷李活道、雲咸街、亞畢諾道交匯處嘅交通，只能用「七國咁亂」來形容，皆因的士揀客、等客，在最需要警察維持秩序時，連一個「男子漢」都見唔到！
唔好話黑夜，即使日光日白，中環花園道纜車總站外，日前又上演的士司機為爭客「混戰」場面，好明顯，又係警察缺席，才會出現咁多「黑的」。喂！阿哥，香港素有「警察城市」之譽，警察比例為全球眾多城市之中最高，有乜理由唔係好似便利店咁，梗有一個喺左近？
「梗有一個喺左近」嘅感覺，近排相信只有常落區嘅CY同埋啲高官才會強烈感受得到；呢呢呢，淨係為了確保CY安全離開，警方要動用過百名警員組成人鏈保護佢嘅座駕離開，外國朋友想唔驚嘆並認同香港呢個「警察城市」都唔得！
讀報察覺近排多咗強姦案、街頭追斬案、吸毒索K事件……老朽要提醒禿鷹曾偉雄，當良民見唔到警察，只見到黑影，呢個城市真係會死亡！