政情：肥仔明 立會「坐正」扮正經
立法會規定，如果主席同內務委員會主席同時唔可以主持會議，就會由內會副主席頂上做代主席，但呢個情況少之又少，但尋日就發生咗。話說主席曾鈺成要去開餐醫肚，適逢內會主席劉健儀又有事唔可以主持會議，於是乎造就咗內會副主席李華明（肥仔明）做代主席，估唔到快將告別議員生涯嘅佢，可以臨近會期尾聲最後一次嘗做代主席嘅滋味。
拉布戰拖垮開會進度，《商品說明條例》尋日終於可以恢復二讀辯論，肥仔明首先以委員會主席身份發言，再坐咗上主席位做咗唔夠一個鐘嘅代主席。肥仔明發言扮晒正經，話依家好多美容公司都用誇張失實嘅手法誤導消費者：「九百八十蚊包你成世脫毛，你話有無咁着數吖？」之後又話最後一次做代主席無乜特別感覺，最開心應該係見到草案三讀通過喎。