人民力量立法會議員黃毓民前日到大埔宣傳選舉活動時，被人用蕉掟中額頭，佢嘅眼鏡幾乎飛脫，當時警方拘捕咗一名四十四歲曹姓男子，到夜晚該名男子已獲釋，而警方至今未有進一步行動。到咗尋日下午特首答問大會，一向會趁機會大嗌口號嘅毓民卻離奇失蹤，唔通佢畀前日隻「飛來蕉」掟親？
毓民話，隻「飛來蕉」根本無辦法傷佢一分一毫，又解釋唔出席答問大會係因為要匿喺辦事處準備今晚繼續拉布嘅資料。毓民又話，知道佢嘅戰友陳偉業同社民連梁國雄會喺答問大會上嗌口號及展示示威物品，既然都輪唔到佢向特首提問，所以寧願喺辦事處休息一陣養精蓄銳。
另外，人民力量尋日報警，話佢哋一名四十幾歲嘅李姓義工前日喺屯門出席教育局局長吳克儉落區時，被一名不知名男子毆打，搞到鼻樑骨折同出現短暫失憶。人民力量主席劉嘉鴻強烈譴責暴力行為，又話以後擺街站或宣傳時會安排多啲人幫手，等大家可以互相照應。