政情：漁農界換人 連「根」拔起

搵陳美德分薄票源

早前有人放風，根哥會退位讓賢畀年輕黨友何俊賢參選，點知根哥隨即澄清話何俊賢唔係佢徒弟，又話漁農界現時形勢風高浪急，好多業界都期望佢連任撐住大局，話自己會再做多一屆。不過，根哥嘅「連任宣言」發出無耐，就傳出經濟動力成員陳美德會加入戰團，並獲鄉事派全力支持，客觀形勢分析，佢有可能分薄根哥嘅票源，有利何俊賢當選。

據聞根哥早前向黨友透露競逐連任嘅意欲，但竟然畀人以佢做咗多屆為由勸佢唔好再選，又話佢再選都未必打得贏其他兩個對手。根哥聽到呢個講法就梗係好唔憤氣啦，佢仲要求該黨做民調，調查佢嘅支持度，希望可以借業界聲音力挽狂瀾，保住呢個坐咗十二年嘅議席，但係似乎唔係好成功，事關背後有股強大嘅勢力正左右大局，根哥不得不退位讓「賢」。

獲力挺參選嘅何俊賢同根哥同屬香港漁民團體，當年根哥仲有份推薦何俊賢入民建聯，估唔到如今倒戈相向，兩人關係確係錯綜複雜。漁農界向來嘅投票意向一直比較團結同集中，如果業界唔再支持根哥參選，轉而支持何俊賢嘅話，咁根哥今次連任成功嘅機會真係微乎其微。不過，如果根哥最終決定讓路畀何俊賢，咁經濟動力陳美德又係咪如傳聞中宣布參選呢？