中環出更：項明生着羊駝毛谷新書
為期七日嘅書展明日開鑼，唔少星級作者都趁機推出新書造勢，好似Sony Computer Entertainment香港董事項明生（James）、「美女廚神」麥潔兒（Kit）、著名網上食評達人劉彬（Issac）及設計大師李永銓（Tommy），尋日齊現身一個活動，推介作品。
尋日三十幾度高溫，卓妮見James着住件毛茸茸嘅背心，原來係佢早前去秘魯買返嚟嘅羊駝毛Alpaca背心，特登着畀大家欣賞，估唔到佢為咗宣傳新書，冒住中暑風險，認真大犧牲。James大讚羊駝毛質地軟熟，價錢平過香港好多。
講起睇書，James話佢中學時代已經狂追三毛作品，當時一本三毛散文，同學之間瘋狂傳閱。佢第一本睇嘅，就係三毛成名作《撒哈拉的故事》，嚟緊年底，佢都諗住去撒哈拉沙漠尋幽探秘。受到三毛影響，佢去旅行唔會要求舒適享受，而係揹住背囊流浪，感受最真嘅本土文化。
麥潔兒食譜當情書
Kit寫食譜多年，笑言煮食似戀愛關係，只要耐心了解食物特性，用心去煮，自然有色香味上嘅回報。有時遇到唔喜歡嘅食物，何妨嘗試去接受佢，話唔定有意外嘅驚喜喎！卓妮向Kit請教美容心得，佢話愛用生紅菜頭、菠蘿、青蘋果、火龍果同薄荷葉，自製高纖抗氧果汁，配合埋屋企張彈床勤做運動，脂肪自然拜拜。
有「品牌醫生」之稱嘅Tommy，其設計公司近日獲選為中國十大品牌公司之首，喜上眉梢。佢坦言，香港設計曾經聞名於世，但近年卻面臨被邊緣化，應該優化獨有特色。
卓妮