政客靠得住，豬乸會上樹。泛民主派對梁振英政府窮追猛打，黑材料滿天飛，有理冇理都好，務求打擊新班子威信，令施政寸步難行。哈，點知來說是非者，正是是非人，身兼民主黨主席嘅立法會議員何俊仁其身不正，先被踢爆寓所涉及僭建，復被揭發漏報業權及公司董事身份，有口話人冇口話自己，唔知咁算唔算係賊喊捉賊呢？
件事係咁嘅。何俊仁○八年連任立法會議員後，向立法會登記冊申報自己無做董事、無擁有公司股份、無擁有物業或土地，講到實牙實齒；原來所謂「三無」統統係假嘅，佢唔止有做公司董事、擁有公司股份，仲擁有物業添。嗱，佢八八年同弟婦成立咗一間公司，各擁一半股份，該公司八九年以三百五十幾萬元購入黃泥涌比華利山一個物業，至今仍然持有，該物業家陣已經升值至二千五百萬元添。
最好笑嘅係，臨近九月立法會選舉提名期前夕，何俊仁先至「知衰」去信立法會秘書處道歉，承認漏報業權及公司董事身份，但就辯稱自己以信託人身份持有股份，以為股份已轉讓予其他人喎。你話喇，身為律師嘅佢，會唔會咁烏龍吖？會唔會咁無記性吖？正如有人踢爆，何俊仁○四至一一年期間每年均以該公司董事身份簽署申報，根本無可能誤以為股份已轉讓予其他人，佢分明係講大話就真。白鴿黨成日質疑人哋冇誠信，咁身為該黨主席嘅何俊仁又點呢？
講到誠信，何俊仁都唔係第一次被質疑嘅喇。白鴿黨藉住最近嘅僭建風暴上綱上線，又去廉署投訴，又提司法覆核，煞有介事，其實何俊仁自己亦被踢爆曾捲入僭建風波，其天后廟道飛龍台寓所露台懷疑僭建活動玻璃窗，直到一年幾前香港刮起僭建風暴，佢先至拆除圖毀屍滅迹。一時涉嫌僭建，一時漏報權益，何俊仁其身不正，仲好意思話人哋，真係唔知醜字點寫。
講開又講，白鴿黨嘅醜聞又點止咁少吖。呢，立法會議員黃成智喺何文田嘅天台屋，咪一樣被揭發僭建；而涂謹申當年被指利用公帑租用自己公司物業作為議員辦事處，更係轟動一時。至於白鴿黨成員涉及「求愛不遂」、「嫖妓尋歡」等等醜聞，更係多不勝數。
所以話啫，當你用一隻手指指向別人嘅時候，仲有四隻手指指向自己。呢班政客平時將自己扮成聖人，企喺道德高地指指點點，呼呼喝喝，其實五十步笑一百步，佢哋可能比其他人更加污糟邋遢。總而言之，信佢一成，雙目失明，九月立法會選舉，選民千祈要帶眼識人呀！