涉嫌騙取政府租金津貼嘅發展局前局長麥齊光被拘捕兼辭去局長職務，曾任佢直屬上司嘅政務司司長林鄭月娥一直對呢個下屬「有情有義」，在事件發酵之初公開表示對佢「百分百信任」，其後又發表「不離棄論」以示默默支持。麥齊光被廉政公署扣查近四十小時後，尋日首度開腔，特別感謝林鄭，仲話佢同太太都好感謝、好感激，所以佢同林鄭嘅良好關係可謂不言而喻。
