立法會即將換屆，主席曾鈺成對張主席櫈有讚冇彈，話椅背夠直，坐得耐都唔怕影響健康，但佢就勁彈議員張新櫈識「反彈」，一起身張櫈就會撞番自己對腳。佢仲話，最唔捨得嘅就係專業兼經驗豐富嘅秘書長吳文華，唔知陳維安正式上任後，佢又會否好似彈啲新櫈咁，大彈新不如舊呢？
話說立法會新大樓張主席櫈係由中環舊大樓搬過去嘅，曾鈺成對呢張櫈讚不絕口，又話秘書處細心到連咕(o臣)都準備埋。不過，班議員張櫈係固定喺地下，只可以前後移動，唔少議員都投訴企起身時會畀張櫈反彈撞親後腳。話時話，當初班議員有份揀選新櫈，點解之後先至發現張櫈有問題？
對於有人話議員喺會議廳內掟嘢係議會暴力，曾鈺成就話呢個講法誇張咗，實情係大部分會議時間都係按照《議事規則》舉行，強調香港隨着社會、政治同經濟嘅不斷變化，如果要議會運作好似二、三十年前一樣，咁係不切實際喎。