政情：麥業成自稱立場溫和
退出咗人民力量無幾耐嘅民主陣線主席麥業成（Johnny），尋日正式宣布參加九月立法會選舉新界西直選，聲言有機會攞到三萬五千票，可以力爭九個議席中最後一席。Johnny仲話，自己立場溫和，而且係一個好人，唔通佢退出激進作風嘅人民力量後變得和善？
Johnny原本係人民力量副主席，早前因為參選問題退出，雖然係咁，佢尋日就話自己同人民力量關係仍然友好，但講到選舉就只可以各自修行咁話。Johnny嚟緊仲會搞個籌款運動，希望支持者每人捐十元畀佢，等佢有足夠資源參選。
新界西泛民主派參選人眾多，點解要投票畀你先？Johnny強調，自己唔似某啲政黨咁走去支持兩年前嘅政改方案，擺明寸爆白鴿黨。不過，佢又表明唔會靠攻擊其他泛民爭選票，聲言自己立場一向溫和，而且係一個好人喎。