政情：白鴿為選票亂抽政府水
立法會選舉九月舉行，各黨派都要諗計宣傳同拉票，但泛民主派就淨係識得怒插新政府抽水，抽得最勁就係民主黨（白鴿黨）。該黨主席何俊仁（鐵頭仁）被揭發懷疑有僭建外，又漏報公司董事身份及股份，其身不正仍厚顏向特首梁振英（CY）大宅僭建窮追猛打。更離譜嘅係，其黨友李永達（高達）同陳樹英兩公婆，尋日話CY冇履行承諾向長者派特惠生果金及「港人港地」政策，新班子僅上任十四日就話要講履行承諾，唔係抽水又係乜呢？
新班子上任兩周 被責未踐諾！
泛民多年來都冇乜新建樹，淨係識得食老本，尤其係白鴿黨，唔知係咪黨窮「智」短，只係一味靠針對新政府抽水，而且毫無水平。好似嚟緊九月立法會選舉會喺新界西分隊出選嘅高達同陳樹英兩公婆，尋日前後腳去抗議CY冇履行承諾向長者派特惠生果金及「港人港地」政策，新班子僅上任十四日，施政報告仲未公布，要CY點樣履行承諾呢？真係笑大人哋個口，有啲人做咗十幾廿年議員都唔知做咗啲乜啦！
身為黨主席嘅鐵頭仁，一樣都淨係識咬住CY唔放，佢近日就CY大宅僭建風波向法庭提出選舉呈請及司法覆核，話CY喺選舉期間作出失實聲明。其實鐵頭仁位於天后廟道飛龍臺寓所亦曾惹起僭建疑雲，幾年前自行清拆露台活動玻璃窗，同被懷疑係毀屍滅迹。此外，鐵頭仁近日又被揭發喺立法會漏報公司董事身份及股份，臨近選舉先至主動去信立法會秘書處致歉補鑊，由於會期快將完結，立法會亦無法追究責任。
白鴿黨本身都有人被揭發有僭建、漏報利益等醜行，但偏偏佢哋就呢啲議題向新政府窮追猛打，除咗係自暴其短外，更加係雙重標準。好似佢哋鬧發展局前局長麥齊光同公務員互租單位咁，其黨員涂謹申當年咪又係喺「匯標」事件中用公帑租用自己持有權益嘅物業做議員辦事處，呢啲咪叫「律己寬、待人嚴」囉！白鴿黨嘅人其身不正，好心佢哋批評人之前自己檢討下先啦！