中環出更：高永文上「潮」 嘗美食 遊古寨
「潮州冷」重鄉情，喺香港長大嘅潮州二代都鍾意尋根。潮州商會青委主任陳光明（Johnny）早前任團長帶隊訪問潮州，來個三日兩夜「潮州文化雞精班」，邊食潮菜，邊做「潮人」。今次旅程吸引咗食物及衞生局局長高永文跟隊湊熱鬧，同行仲有潮青副主任胡炎松（Anven）及潮商副會長周振基。
如果要領略潮州文化，齋講無用，行動最實際，為了解潮州菜起源，團友移師到酒家上堂，每碟菜式有晒筆記，解釋菜式用料及歷史底蘊，團友拎起筷子試埋味，記憶自然深好多。潮州菜如「臘腸高燒芋」、「拍蒜煎鎗魚」等，Johnny都話係首次品嘗，大叫過癮，大家亦豎起拇指讚好。
「潮」女賢慧 造就富商
醫飽肚，眾人又參觀潮州永寧古寨，睇吓潮式建築嘅特色，又到潮汕歷史博物館及城鄉規劃展示館參觀，了解潮州文化。據講當地一名潮汕歷史教授與大家分享潮州女性嘅賢慧美德，無怨言照顧丈夫、子女及家公家婆，等丈夫無顧慮為事業打拚，造就今日好多潮州富商，實在應記一功。
三日行程話咁快結束，臨走前，眾人狂掃地道手打牛筋丸、墨魚丸、魚蛋等，掃足幾十斤至收手。Anven笑言，各式潮州肉丸塞爆旅遊車每個角落，滿載而歸。
卓妮