空氣指標太寬鬆 半年又殺千四人

唔係嚇大家，煲呔曾政府環保交白卷，搞到本港空氣長治久污，結果真係死得人多o架。環保組織引用香港大學新達理指數，單係今年頭六個月，已經有逾一千四百名市民間接死於空氣污染，而且仲大大增加公共醫療負擔。所以話啫，氣候逃犯真係害人害物。

大家仲記唔記得，早前有報告指，煲呔曾上台七年，空氣質素每況愈下，平均每年導致一千人提早死亡。原來呢項報告已經講少咗，空氣污染殺人，實際情況及數字比大家想像嘅嚴重得多。功夫茶想問環保官僚，到底仲要拖到幾時至肯認認真真改善空氣質素呀？係咪要死更多人先至識驚呀？

如果環保官僚淨係識坐喺辦公室歎冷氣，唔多清楚空氣污染有幾嚴重嘅話，等功夫茶講你知喇。環保組織分析環保署各個空氣監測站數據，發現全港十四個監測站所錄得嘅二氧化氮、懸浮粒子同微細懸浮粒子等濃度，全部超出世衞嘅年均標準，後兩者更加超標一至兩倍，而重災區銅鑼灣因為車多人多，路邊監測站錄得二氧化氮年均水平超標約兩倍。你話喇，全港一片烏煙瘴氣，市民被迫「吸毒」，有乜法子唔死得人多吖！　

最離譜嘅係，港府治污不力，淨係識得度橋掩飾，自欺欺人。環保組織炮轟，本港空氣質素指標落後，早就不合時宜，就算兩年後實施新指標，仍然遠較世衞標準寬鬆，甚至比內地嘅一級新標準都不如，你話係咪搞笑吖。以廿四小時懸浮粒子標準為例，世衞水平係每立方米五十微克，而港府嘅新標準係每立方米一百微克，兩者相差一倍，擺明係粉飾太平，誤導市民喇。

喂，空氣監測數據係顯示空氣質素嘅主要指標，事關七百萬市民嘅健康，咁都可以弄虛作假，唔怪得空氣污染愈來愈嚴重，死得人多啦。見微知著，港府治污係幾咁敷衍塞責，求求其其！

空氣指標太寬鬆，半年又殺千四人，真係令人不寒而慄。新任環境局局長黃錦星聲稱改善空氣質素係佢嘅施政重點，希望講得出做得到喇。尤其係新政府開局不利，多風多雨，更加要做番台好戲畀大家睇。貪曾政府環保一無是處，如果新政府能夠創出一片新天地，話唔定可以一吐烏氣，管治困局撥開雲霧見青天ｏ架！