政情：謝偉俊「強勢」 KK告急
參加立法會直選有地區樁腳箍票自然事半功倍，旅遊界議員謝偉俊（Paul）尋日宣布參選九龍東直選，即時搵嚟最少廿個區議員「抬轎」壯聲勢。
盛傳獲中聯辦力撐嘅阿Paul，尋日喺金鐘添馬公園宣布參選，現場所見至少有十多名報稱獨立嘅區議員現身支持，連自由黨成員、黃大仙區議會副主席黃錦超，以及廠商會代表林大輝牽頭嘅C18成員、觀塘區議員姚柏良都有現身力撐，呢個陣容認真令人意想不到。
「空降」九龍東嘅阿Paul樁腳眾多，政圈預料最受影響嘅係工聯會黃國健（KK），有工聯會中人爆料，阿Paul依家擁有嘅樁腳數目，比「票后」陳婉嫻當年參選九龍東仲要多，難怪有人為KK選情憂慮。
究竟阿Paul同KK會皆大歡喜齊齊勝出，定係最終兩個只能活一個呢？