政情：「80後」參選 挑戰霍震霆
身兼港協暨奧委會會長嘅立法會體育、演藝、文化及出版界議員霍震霆（Tim霍）一向被人話佢咁多年都側重喺體育發展，對文化、出版界無咩建樹。盛傳做電影出身嘅港區人大代表馬逢國會挑戰Tim霍外，尋日又多個「八十後」周俊輝宣布參選，佢十四歲開始學太極，依家亦係畫家，可以話係體育、文化兼顧，仲話挑戰建制派無有怕咁話。
三十二歲嘅周俊輝掹車邊都算係八十後，佢話細個學太極時已經問師傅能否喺立法會體育界別投票，師傅就話佢冇票，佢嗰陣已經覺得功能界別好唔公平。到出來工作時，作為「伙炭藝術村」成員嘅佢，亦睇到好多文化藝術工作者係冇得投票嘅，所以佢希望最終能夠取消功能界別喎。
咁點解佢又參選功能界別呢？周俊輝話，參選目的係希望入立法會改善選舉制度，就算取消唔到功能界別，都要令業界可以人人有票咁話。周俊輝咁有心，唔怪得連藝人黃耀明都特登錄短片撐佢啦！