據講，原來梁太根本從來無答應出席首映，而實際上梁太根本無出席。呢位投訴人話，其實唔少商界人士都係慕梁太之名而來，大家都想見一見特首夫人，所以先咁踴躍捐錢，仲話當晚籌近二百萬添！
我哋就此問過總監彭徐美雲，佢承認確有發信邀請梁太出席首映，但絕對無話實梁太一定出席，唔明點解有咁嘅指控。對於女童軍向商界發信一事，彭太更指與事實不符，佢只係內部發信畀會長、各副會長、名譽副會長及分會主席，通知有呢個慈善首映活動，呼籲佢哋按個人能力捐款支持。
彭太又話，已發信邀請梁太做女童軍總會會長，話梁太仍在考慮當中，但據聞梁太有意出任會長一職。