政情：認錯自己人 陳家強(火羅)爆
新聞界每逢六至八月，都有大量實習記者湧現，班實習生周不時都會叫錯局長名稱。但勢估唔到，連財經事務及庫務局局長陳家強都馮京作馬涼，連局長名都撈亂晒，明明想講前審計署署長鄧國斌，點知把口就講咗佢細佬公務員事務局局長鄧國威個名。政界傳聞佢叫傻強，原來確係有道理。
話說尋日議員追問新任審計署署長孫德基嘅操守有問題，質疑政府點解要委任佢，負責答問題嘅陳家強就話，前署長鄧國威（應該係鄧國斌）係公務員身份都惹人質疑，認為咩嘢背景都會有人不滿。甘乃威聽到後即刻寸爆陳家強，話連自己人個名都搞錯，點做局長呀，陳家強雖然知衰，但塊面就當堂黑晒。
其實鄧國斌同鄧國威兩人喺政府打滾咁多年，兩個都係高官，基本上係人都知前者係大佬、鄧國威係細佬，就算分唔清邊個打邊個，斷估都唔會叫錯佢哋名，家吓陳家強嘅表現猶如實習生，唔知佢識唔識面紅呢？