政情：吳文華退休 做兼職導賞
喺立法會工作多年嘅秘書長吳文華（Pauline）嚟緊九月就會退休歎世界。Pauline經歷回歸前嘅立法局、臨時立法會同立法會，一共做咗廿二年，尋日特意趁立法會最後一個星期開會請大家食「散水餅」，佢透露退休後除咗會攤抖吓做番啲自己鍾意嘅事外，得閒仲會重返立法會做兼職帶導賞團，等佢可以欣賞番自己對新大樓安排嘅一枱一櫈。
Pauline話佢八月會去加拿大旅行兼探朋友，十月尾會去澳洲同新西蘭玩三個禮拜抖抖氣，所以佢卸任後第一件事就係要買番部新相機，方便遲啲周圍去影相。
秘書處會喺星期日夜晚為議員舉行惜別晚宴，到時所有議員將會聚首一堂，暢談四年議會工作點滴。各黨派曾經密斟會喺晚宴上向Pauline送上離別禮物，似乎收到風聲嘅Pauline就用比較調皮嘅口脗話：「我知道有禮物，但唔知佢哋會送乜喎！」