政情：工聯風車陣 未戰已崩潰
早於去年農曆新年，工聯會已經話嚟緊九月立法會選舉，一定會派人喺超級區議會及五個地方選區參選，誓要實踐一拖五風車戰陣。好可惜，雖然工聯會企得硬，但點硬都有軟弱嘅時候，有傳西環喺呢個關鍵時刻出手勸退佢哋出選九龍西嘅副理事長周聯僑（僑哥），甚至唔准佢哋再派人喺九龍西參選，但最終結果就要等工聯會理事會開會後先揭曉。
僑哥未出師就甩轆，最大得益者相信係同屬建制派嘅梁美芬。今次勸退除咗影響成個選舉部署外，隨時連參加超級區議會嘅工聯會榮譽會長「票后」陳婉嫻（嫻姐）嘅選情都受影響。另一位榮譽會長鄭耀棠（棠哥）尋日同傳媒茶敍時講明，嫻姐爭取選票會寸步不讓，暗示無可能同其他建制派參選人協調到，其他人想贏嘅話，就請自求多福喇。
同民記搶票絕不手軟
工聯會嘅風車戰陣崩潰，立法會選情有幾波譎雲詭可想而知。棠哥透露，以往唔少掛住工聯會牌頭嘅參選人，同時擁有民建聯黨籍，但佢宣布嚟緊選舉再冇呢支歌仔唱喇，因為所有代表工聯會參選嘅人，唔可以有其他政黨黨籍，粗略估計將有十幾個工聯會代表會退出民建聯，包括立法會議員王國興及黃國健。雖然棠哥強調同民建聯嘅關係不變，不過實際上已劃清界線，選舉搶票絕不手軟。
除咗選舉被勸退外，尋日亦有匿名信話應徵做勞工及福利局副局長嘅前工聯會法律顧問鄺志堅已經肯定獲聘任，遴選期間更請過勞福局局長張建宗飲萬四元一支嘅紅酒、食九千元晚飯，做法等同買官職。勞福局發言人尋日嚴正否認事件，話指控係子虛烏有。我哋亦曾經多次聯絡鄺志堅，但至截稿前一直未有回覆。雖然未知呢個指控係咪成立，但有關人士肯定有排煩。
講到新政府近日引發唔少風波，棠哥就聲言冇後悔支持梁振英（CY）做特首，希望大家畀時間CY發揮，仲要求新政府最遲要喺施政報告前公布一系列利民政策，證明政府做緊嘢喎。棠哥又向新班子建議，為月入三至五萬元嘅中產提供買樓免首期安排，但至今政府未有回覆佢哋。