中環出更：陳啟宗投地 執死雞夢碎
一向牙擦擦嘅恒隆地產董事長陳啟宗（Ronnie），十幾年來都無再出手喺香港投地，成日公開叫人唔好再局限喺香港食「大茶飯」，要北望神州。不過，日前佢失驚無神入標競投前北角邨地皮，引起政商界一陣嘩然，唔通佢醉翁之意不在酒，志在以行動投新政府信心一票？
一直緘默嘅Ronnie，尋日現身「香港明天更好基金」活動時親自揭開謎底，其實佢以為新政府啱啱上任，可能大地產商會抱持觀望態度，所以抱住執死雞心態入標，點知塊地皮勁受歡迎。尋日揭盅幅地王由新鴻基地產投得，雖然Ronnie執平貨算盤打唔響，但係都做咗場好戲，暗撐特首梁振英（CY）新政府喇！
對於新政府上場後受到唔少掣肘，身為香港明天更好基金主席嘅Ronnie就語重心長話，大家應該畀啲時間佢哋做嘢，唔應該凡事小題大作。至於CY屋企僭建風波，Ronnie話肯定唔涉及誠信，事關佢去過CY屋企食飯，佢作為地產商都唔知嗰個玻璃棚係僭建！
鄧淑德繼續留守基金
同場仲有基金嘅行政總裁鄧淑德（Karen），佢喺特首選戰中曾借調出任CY競選辦副主任，雖然選舉完咗後佢就重返基金崗位，但係有關佢加入政府嘅揣測從未停過，由特首辦主任到最近嘅新聞統籌專員，大把位等佢揀。不過Karen再次否認，仲話留低喺基金一樣可以幫到CY，唔一定要入政府喎！
卓妮