中環出更：龍年效應名人子女趕生B

腹大便便嘅Nisa，早前出席菁英會執委晚宴，見佢不時摸住肚皮，待產心情好雀躍。Nisa報喜話，腹中BB係男嬰，佢同老公都興奮不已。初次懷孕，食嘢口味無大變，一樣食得又瞓得。至於揀順產還是開刀？Nisa就話十五十六，但喺懷孕初期已預訂私家醫院嘅床位，佢慶幸自己訂得快，事關身邊待產嘅老友仍未等到床位，心急如焚。

黃浩鈞學定剪臍帶

同樣懷龍B嘅Iris，日前同老公黃浩鈞（Howard）出席馬場廠商會盃賽，令人感受到佢嘅幸福。肚中BB係囡囡，Howard話，會陪太太入產房，已上定堂學剪臍帶，諗起都緊張。今年爆龍B潮，Iris都擔心將來B女入學要面對更大競爭，希望佢生得精乖伶俐，考到好學校，唔使父母操心喎。

陳嘉琪（左）八月尾誕「小龍女」，老公黃浩鈞（中）將陪入產房。右為廠商會青委副主席羅程剛。（嚴少阡攝）

顏明潤（右）誕下「龍仔」三個月，媽媽顏吳餘英（中）及細妹顏明秀（左）都戥佢開心。

廠商會青委主席顏明潤都加入「龍媽」之列，早前誕下嘅「龍仔」，已經三個多月大，今次係佢嘅第二胎，兩個囝囝令佢感到心滿意足。佢笑言老公恨生女，但兩個夠晒數，決定「收工」唔再生。

卓妮