廉署速速查貪曾 否則好快失民心

執法者查案貴乎神速,尤其係涉及高官貪腐案件,更加係分秒必爭刻不容緩,否則賊過興兵乜鬼都冇用啦。令人百思不得其解嘅係,廉政專員公署唔知係咪吞咗幾擔豬油,行動慢到呢,十足十龜爬,而且冇人知道佢究竟爬到邊一忽。廉署保密,密密實實,就係咁解。

聰明嘅讀者大概已經估到功夫茶講緊乜,冇錯,功夫茶講緊嘅又係過氣特首曾蔭權嘅貪腐醜聞。廉署話就話立案調查,點不知由貪曾仍然在位,查到七月一日夠鐘執包袱落台,都未有任何具體情況公布。人哋落台之後一個屈尾十已經遠走高飛,飛咗去外國遊埠歎世界,萬一有人着草潛逃點算好呀?戴罪之身逍遙法外即係法治蒙羞啫。

講開又講,香港嘅廉潔形象多得貪曾帶挈,如今變得家道中落,簡直係眼冤到冇朋友。根據國際調查機構政經風險評估嘅調查,香港喺亞洲嘅廉潔程度本來排第二,僅次於新加坡,但係自從東方報業集團連環踢爆曾蔭權接受富豪奢華款待之後,政經風險評估調查結果顯示,香港排名首次跌出三甲,只係排第五位咋。喂,香港居然由一個貪遍海陸空嘅「痛心特首」管治,排名唔急跌至奇啦!

「東方報業民意調查」顯示,三成八受訪者認為廉署應該加快調查貪曾;三成四狠批廉署拖得太耐,必須交代進展;一成二直斥廉署失職,簡直係投鼠忌器。

至於貪曾卸任之後離開香港仍然未有行動,三成五受訪者講明對廉署失望,認為查案應該雷厲風行;三成一要求廉署立即調查,唔能夠任得貪官逍遙法外;一成八更加質疑廉署有心放生曾蔭權。

簡單咁講,將廉潔奉公作為核心價值嘅香港人已經冇乜耐性,廉署若然再拖落去,好快就會失民心。你知啦,失民心,失天下,到時廉署就冇資格厚臉皮咁話「香港勝在有你同ICAC」。

講真吖,廉署秉公辦理將貪曾繩之於法,為公為私都係好事。民意調查又顯示,三成九受訪者認為,廉署盡快調查有助樹立強勢廉潔政府形象;三成一覺得可以挽回市民信心;兩成一指出能夠顯示新政府同前朝腐敗政府劃清界線。

其實成件事一字咁淺,有案就要查,有罪就要罰,理得佢天王老祖都冇面畀。天子犯法與庶民同罪嘛,台灣前總統陳水扁固然已經淪為階下囚,法國前總統薩爾科齊同樣接受大搜查,冇理由香港特首居然有免死金牌庇蔭特權啫。

總而言之一句到尾,廉署速速查貪曾,否則好快失民心,廉潔之都名譽掃地就冇癮啦!