政情：社福界混戰益咗張國柱
社福界立法會議員張國柱尋日正式宣布競逐連任社福界功能組別議席，佢話希望今屆可以攞到六千票，又話會喺選舉提名期開始第一日交報名表，等佢可以盡快開展選舉工程。至現時為止，有意挑戰阿柱議席嘅界內人士有三人。
現時考慮參選嘅建制派社福界成員包括單親協會總幹事余秀珠同社會工作人員協會會長郁德芬。余秀珠係立法會議員林大輝創立組織C18嘅成員，而郁德芬就同特首梁振英（CY）相熟，佢仲曾經喺特首選舉結束後發表聲明祝賀CY當選。
不過，阿柱最大嘅挑戰者應該係港大社會科學院副院長陳麗雲。陳麗雲嘅學術背景濃厚，加上佢拒絕偏幫政府嘅態度，令佢成功喺去年嘅選委會選舉以三千八百幾票榮登票后，實力絕對不容忽視。
有社福界人士分析，建制派喺社福界嘅票源一向唔多，多人出戰肯定會攤薄票源，相反阿柱就可以全取泛民鐵票，睇嚟個局愈亂佢愈有着數。