政情：民記工聯劃清界線
九月立法會選舉如箭在弦，建制派各個陣營都對增加嘅十個議席志在必得，過往係友好，喺今時今日已經不能同日而語。民建聯同工聯會夠友好喇，但因為票路太相近，都難免因選舉而大鬥法，其中一個大鬥法嘅主戰場係新界西。兄弟鬩牆嘅情節，包括民建聯散布工聯會已經夠票嘅講法，工聯會就更加狠下心，幾名身兼民建聯嘅黨員，全面退出民記。
新界西幅員廣闊，喺今次立法會選舉一共選出九個議席，攞到多過九分一嘅選票就可以當選，表面睇唔係太難，可能因為咁，無論建制派定係泛民，都出現廝殺。
建制派方面，有消息話民建聯中人深入工聯會陣地，放出工聯會名單「夠票」當選嘅疑幻疑真消息，趁此名正言順深入工聯會地盤，挖走工聯會嘅樁腳。
被突襲嘅工聯會即時作出「快狠準」反擊，首先反踩入民建聯地盤「試水溫」，另一方面又採取「先安內後攘外」策略，向自己人澄清不利流言，不過有工聯會中人私下討論，始終民建聯同工聯會過去嘅運動關係太密切，先會畀人有錯覺民建聯同工聯會可以畫上等號，所以避免誤會或畀人魚目混珠嘅最佳方法，就係退出民建聯表明心迹，總之就要畫清界線。
雙重身份釀退黨潮
據悉，工聯會最近退出民建聯嘅數目都唔少，我哋聽聞至少有四人，包括兩名北區區議員黃宏滔和曾勁聰，以及元朗區議員陸頌雄同陳文偉。不過據聞以上四人退黨暫時仲係個人層面，唔算係工聯會落柯打，要佢哋「雙重身份」二揀一。今次選舉競爭激烈，睇怕建制派喺選舉前有更多「鬼打鬼」嘅場面，大家要拭目以待。
大混戰下，相反同屬建制派嘅田北辰就決心殺出一條血路，佢雖然係新界鄉議局顧問，但就打正旗號反僭建，諗住旗幟鮮明唔要鄉事票，城市人嘅票至係佢嘅目標。熟悉鐵路交通問題嘅田二少仲建議搞雙層輕鐵，咁啲乘客就唔使逼到上唔到車嘞。佢話希望攞五萬票，咁就可以穩穩陣陣入立法會嘞。不過佢喺網上聲言，有人最近公然問佢買唔買票，佢話當然唔會做呢啲嘢喇。