特首梁振英（CY）競選時成日話香港未來唔可以再將視野局限喺呢幾百平方公里入面，要放眼同中國及其他東南亞地區競爭。CY當中特別提到香港嘅經濟增長不及新加坡，明言上任後會致力倣效新加坡經驗。不過，前公務員事務局局長王永平尋日出席論壇時就大吹淡風，質疑新加坡嘅民主發展步伐同香港唔同，提醒CY唔好盲目將外國模式複製落香港身上。
平叔話，雖然新加坡喺八十年代成功將西方政治結合東方價值，令國家經濟發展跑得快過其他東南亞地區，但佢點出新加坡政府只向國民提供有限度嘅民主自由，又話當前總理李光耀逐步淡出政壇，質疑李光耀制度好快就唔可以繼續維持落去。平叔要求新政府捍衞本港引以自豪嘅人權、自由，話香港如果無晒呢啲核心價值，就會變到同內地其他城市無分別喎。