達官貴人一個二個僭建已經唔啱數啦，更加唔好講過氣特首曾蔭權涉嫌貪污瀆職，勢估唔到連港鐵咁大間上市公司都違規經營。目無法紀可能係一種傳染病，交叉感染人傳人之下搞到法治之區變咗東亞病夫。
港鐵嘅違規經營係咁嘅，多年來不斷喺鐵路隧道密密鋪設光纖電纜，出租網絡畀流動電話營辦商，又透過子公司分租光纖網絡同批售頻寬服務畀其他電訊商，每年估計最少賺兩億元外快。地政總署確定港鐵呢一種「地下秘撈」行為違反土地契約，正研究採取行動執行契約條款，最嚴重嘅後果係收回土地或者禁止港鐵再出租光纖。
喂喂喂，如果禁止港鐵再出租光纖，手機用戶就大劑嘞，搭港鐵冇得打電話或者上網，十足十就係一場「無網之災」。你知啦，香港人每分每秒都係機不離手嘅「低頭一族」，如果地下穿梭之時冇得玩手機，難受程度話唔定慘過落地獄。
香港人真係好鍾意玩手機o架，合併前嘅地鐵範圍之內，每日大約有九十萬個電話打出，每日總通話時間係一百九十萬分鐘。不過可惜吖，港鐵呢一種透過「你玩手機我賺錢」嘅秘撈始終不符土地契約規定。學似敗選特首嘅唐英年金句話齋，違規就係違規。地契訂明鐵路隧道以及車站內嘅設施，只能與運輸用途有關。地政總署諮詢法律意見後確認，港鐵提供電訊服務違反地契條款。
違規經營已經唔要得啦，更加令功夫茶覺得火滾嘅係，既然有秘撈可賺，點解唔回饋乘客呢？點解仲要不斷加價呢？唔計秘撈已經賺大錢，計埋秘撈更加和味龍，拒絕回饋乘客嘅港鐵充滿貪曾本色，大小便宜舔到盡！
地政總署禁止港鐵再出租光纖嘅可能性雖然冇咁大，不過另一個處理辦法對於乘客都好傷。如果地政總署要求港鐵補償地價差額，有機會將開支轉嫁流動電話營辦商，而營辦商亦會向消費者開刀，上調電話隧道費。到時候，玩手機會變得好貴囉。
其實計功夫茶話齋，最理想嘅係港鐵補地價，然後維持一切不變，即係港鐵硬食呢一筆「違規罰款」，唔好轉嫁畀消費者。喂，一人做事一人當吖嘛，你違規你罰款，與人無尤噃，天經地義啫，更何況港鐵賺到盆滿缽滿，完全罰得起！
秘撈照賺價照加，港鐵違規舔到盡，若然補地價之後維持一切不變，當係另一種回饋乘客嘅方法都好吖。嗱，新政府作為港鐵嘅大股東，呢一鋪真係要為小市民謀取福利呀，唔可以再好似舊政府一樣助紂為虐o架！