政情：李慧琼剛入行會即請假
新任行政會議成員李慧琼（Starry）好大機會參選超級區議會議席，要突圍而出自然要搞好形象工程，但佢最近卻疑似「失手」，有評論話佢出席宣誓儀式時嘅衣着，即藍色背心配襯米白色外套唔夠莊重，Starry話當日一心想顯現年輕同有活力嘅一面，今次失咗手，佢會聽吓其他人嘅意見。
三料議員難分配時間
Starry係政界唯一身兼行政會議、立法會同區議員於一身，即係「三料議員」，時間點分配都係一門學問，第一個考驗可能就係下周二舉行嘅立法會教育事務委員會，當日教育局局長吳克儉會出席，本身係委員會主席嘅Starry自然要在場，但同日又要開行會，Starry惟有要向行會請假兩小時。
咁多嘢做，自不然要犧牲同囡囡相處嘅時間。Starry話，囡囡知佢入行會，即時問佢暑假有幾多時間陪佢，之後佢終於諗到叫埋囡囡幫手派傳單，一來可以多啲時間見面，又可以等比較怕醜嘅囡囡多啲接觸唔同嘅人，一舉兩得。