中環出更：朱玲玲嫌郭晶晶太靜
立法會議員霍震霆長子霍啟剛，盛傳年底就會同跳水公主郭晶晶拉埋天窗，相信大家都熱切期待外，啟剛媽咪朱玲玲（Loletta）就更加緊張。卓妮尋日喺灣仔君悅酒店門外巧遇Loletta，一講起啟剛嘅婚事佢就笑到見牙唔見眼，問佢覺得未來新抱點，佢就笑稱：「OK啦！無咩嘢呀，係比較靜啲！」睇嚟晶晶要搵啲話題同奶奶講吓先至得喇！
拒爆婚期擺酒地點
Loletta話，傳媒都報道晒啟剛十一月結婚嘅消息，但實際婚禮日期及擺酒地點，佢就繼續幫仔仔保守秘密，話留番啲私隱畀一對新人喎。啟剛同晶晶呢對金童玉女喺○四雅典奧運結緣，一拍拖啟剛就即刻帶女友見媽咪，認真孝順。當時Loletta亦好識做，叮嚀啟剛唔好畀咁多壓力晶晶，等「國寶」可以專心比賽，結果晶晶大獎一個接一個。
將來晶晶退役嫁入霍家，唔知會否生番幾個小朋友畀奶奶玩吓呢？Loletta就繼續好識做話，一切隨緣，唔會畀壓力，等啲後生自己決定喎，奶奶咁識做，相信晶晶呢個準新抱都一定會「好識做」啫。至於二仔啟山，Loletta就話無過問佢嘅感情事，但男兒志在四方，遲婚少少都無問題啦！睇嚟Loletta除咗係最美麗港姐之外，仲係個好媽媽同好奶奶。