安全條例懶執法 路上好難零意外

呢嗱嗱嗱，路上又有流血意外嘞，而且係奪命車禍，有人不幸淪為枉死城冤魂。事發現場係大埔吐露港公路往上水方向，近康樂園橋面。尋日凌晨兩點幾，一架新界的士壞車拋錨，停喺吐露港公路慢線，一架警車到場處理。過咗冇耐就出事嘞，一架滿載乘客由旺角駛往上水嘅58S通宵專線小巴，失驚無神撞向警車車尾，撞到警車衝去快線打橫停於路中心，事後路上見唔到小巴有煞車痕迹。

高速公路高速炒車唔慌唔大劑，小巴裏面六男三女受傷，其中一名五十八歲男子送去沙田威爾斯親王醫院，當時已經失去知覺，救護員不停以心外壓搶救，可惜最終都係返魂乏術。亦即係話，車禍導致一死八傷。不幸中之大幸就係，被撞嘅警車當時內裏無人，警員剛剛落車處理新界的士拋錨，否則後果可能更嚴重。

好嘞，大家可能會問，死者有冇佩戴安全帶呀？安全帶呢家嘢好重要o架，英國王妃戴安娜十五年前如果有佩戴安全帶，即使遇上車禍都未必會魂斷巴黎o架。好衰唔衰答案係冇嘅，死者就係懷疑因為冇佩戴安全帶而拋離座位撼向前面椅背，結果撞斷頸骨致命。

講到呢度，功夫茶真係要同所有乘客苦口婆心講多次，無論係的士、小巴或者私家車，搭車千祈唔好嫌麻煩，一條安全帶隨時係天堂同地獄嘅生死之別。為咗貪少少舒服而唔戴安全帶，最終冇咗條命仔認真唔抵呀，老友。

針對車禍多到嚇死人嘅亡命小巴，政府訂咗好多安全條例，包括乘客必須佩戴安全帶，否則最高罰款五千元以及監禁三個月，小巴又要安裝超速警報器同埋限速器，時速不得超過八十公里。之不過問題係，警方有冇執法呀？有冇依法處理違規行為呀？唔係話冇嘅，少之又少咁解囉。就安全帶問題，二○一○年警方只係發出二千五百六十七張傳票同罰款通知書，相對於全年千千萬萬甚至億億聲嘅乘客人次，簡直係微不足道。

即係咁，安全條例懶執法，路上好難零意外。警方少檢控好容易令人產生誤會，以為搭小巴唔扣安全帶係合法嘅，從而構成致命危險性，一撞車就隨時搞出人命。

好心警隊一哥曾偉雄生性啦，唔好成日出動胡椒噴霧玩顏射，吩咐手足重視交通安全條例吖嘛，人命關天呀！