政情：政府山開P 爭取保育西座
政府決定清拆中區政府合署西座，有部分人好唔捨得，原來西座餐廳早喺一九六九年搞過新潮舞會，當時嘅殖民地政府與民同樂。政府山關注組召集人羅雅寧幾經辛苦，終於搵到當年舞會嘅珍貴歷史圖片，果然係好新潮、好迷幻。
羅雅寧為咗爭取西座免遭拆卸重建嘅厄運，會喺今個星期六搞番個政府山新潮化裝舞會，佢話當然最想喺番西座餐廳搞啦，但係政府就唔批准，諗住退而求其次，喺政府合署空地大樹下跳舞，但都唔得。最後只好喺終審法院對出嘅一片小小空地跳舞，叫做好過無，總算係政府山嘛。
當年舞會有泰迪羅賓嘅花花公子樂隊表演，羅雅寧正努力聯絡緊樂隊，希望佢哋可以親身來舞會，為保育西座打氣喎。據聞前高官黃錢其濂已答應出席，一向愛以旗袍示人嘅佢，相信唔使點打扮，已經好懷舊，啱晒feel。