政情：方健儀請飲廉記咖啡
廉政公署嘅咖啡邊個飲親都係麻煩上身，尋日新任廉政專員白韞六履新，喺北角廉署總部會見傳媒之後，廉署新聞組嘅同事就攞咗兩大壺令人「聞風喪膽」嘅咖啡出嚟招呼記者。不過，最大亮點並非杯咖啡，而係斟咖啡嗰個人，就係過檔廉署新聞組無幾耐嘅前電視女主播方健儀（Akina）。
原本斟咖啡係好小事，但前主播幫舊行家斟咖啡呢個情景又確係幾特別，大家於是舉機影相留念，甚至連佢前公司同事都影埋一份，搞到Akina好尷尬。相信Akina嘅「粉絲」睇到呢段新聞後，會好恨飲呢杯咖啡。白韞六會見記者時，原來都未有機會試過廉署咖啡，估唔到記者飲先過佢。
白Sir去年離開入境處後，已放咗好多月假，叉足電先返新工。不過，佢尋日履新就因為交通問題遲到七分鐘，所以佢話要遲十五分鐘先至收工喎，希望佢查貪曾及其他貪污案件唔好遲就得喇。