政情:老公英國湊仔 撐林鄭做CS

新上任嘅政務司司長(CS)林鄭月娥出晒名「好打得」,但早前政府公布新班子問責官員名單時,林太就好感性話,自己係受到老公林兆波鼓勵,先會答應特首梁振英邀請出任CS,罕有咁流露柔情嘅一面。林太尋日正式履新,急急上電台接受訪問,被主持人問多兩問,再自爆老公支持佢做高官,竟然要「離佢而去」,呢個理由聽落真係幾獨特。

林太老公林兆波有世界知名學府劍橋大學博士學位,曾經任教中大數學系,絕對稱得上係高級知識分子。當年林太為咗照顧一對喺英國讀書嘅乖仔節思及約希,有常秘唔做自願降級去駐倫敦經濟貿易辦事處做處長,佢老公當時亦辭埋中大數學系教席一齊去英國居住。

林太升任CS後,可以預期工作比以前做發展局局長時更加忙碌,今年初嘅時候,林太亦曾放風,話自己公務生涯差唔多夠鐘,早幾日佢就自揭,係老公支持佢留低,可見佢兩公婆咁多年仍然有商有量。林太尋日再透露,自己係小女人,○七年做發展局局長時亦問過老公意見,老公表示支持外,仲用英文講咗句:「I would stay away from you」(我會遠離你),林太至今仍覺得可圈可點。

林太解釋,擔任問責高官,對佢本人、甚至家人都會構成好大壓力,佢老公為咗令佢無後顧之憂,可以專心發展事業,決定留喺英國照顧對乖仔,呢點令到林太十分之感動。平時好少講私事嘅林太,近期頻頻展現柔情一面,唔通真係想搣甩「好打得」之名?

再澄清唔想做特首

林太身為特區政府第二把交椅,民望又一直高企,難免會畀人覺得佢有野心競逐特首之位。佢尋日再一次澄清,話自己係一個務實嘅人,為官咁多年都只係想做實事,對政治實在無野心,而且佢亦好享受做輔助角色,唔太喜歡做最高嘅領導位置喎。林太深諳「坐這山,望那山,一事無成」之道,實在值得一讚。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報