中環出更：金刀梁扮貓王型爆穀倉舞會
香港大學為延續成立百周年嘅喜悅，日前喺港大陸佑堂搞咗個懷舊Barn Dance（穀倉舞會），為港大獎學金基金籌得六十萬元。當晚新舊校友聚首狂歡，重溫青葱歲月，港大校務委員會主席梁智鴻（金刀梁）一身「貓王」造型成為全場焦點，拎起結他自彈自唱型到爆，唔少人都爭住同呢位「天王巨星」合照。梁太笑笑口話，老公戴咗假髮，令人眼前一亮喎！
身為港大校友嘅前民政事務局常秘李麗娟（媽打）係舞會召集人之一，大家知道媽打就嚟牛一，特別預備咗個巨型蛋糕製造驚喜，氹得佢好開心。
購馬會禾稈草布置
媽打話，穀倉舞會喺六、七十年代曾經好流行，係港大每個宿舍嘅年度活動，後來因社運而暫停，依家舞會再現，大家都玩得好投入。佢仲話，為咗將會場布置成「穀倉」，特別向馬會購入一批禾稈草鋪滿一地，真係有心思。
同樣係港大校友嘅Sony Computer Entertainment香港董事項明生（James）亦一身西部牛仔打扮，維妙維肖，佢笑稱格仔衫同喇叭褲都係幾經辛苦喺衣櫃底搵番出嚟，再着番依然fit到漏。James大讚媽打跳牛仔舞頂呱呱，佢話大家平時收收埋埋，原來都係跳得之人！到場湊熱鬧仲有將於九月過檔中電做企業發展總裁嘅莊偉茵，同James玩得好開心。
太子珠寶鐘錶係晚會主要贊助機構，主席鄧鉅明夫婦孖住姐夫朱繼陶夫婦、莎莎國際主席郭少明夫婦盛裝赴會。玩到興起，鄧鉅明同老友郭少明仲大開金口，獻唱經典名曲添。
卓妮