嘩嘩嘩！七一前夕發生一件咁嘅事，好鬼死得人驚啫！
嗱，大家唔好以為功夫茶講緊亂噴胡椒霧嘅香港警察，雖然呢種慣性欺凌示威者嘅「港產公安」都好得人驚。功夫茶講嘅係一宗車禍，而呢一宗車禍有機會造成生靈塗炭，非常之咁恐怖。
六月三十日凌晨喎，廣東河源龍川縣高速公路之上，有一架化工廠貨車同另一架貨車相撞，並且發生火警，事故原因懷疑係貨車司機疲勞駕駛所致。好衰唔衰，炒埋一碟嘅貨車載有二十九噸半化學品苯酚，車禍造成九噸半苯酚洩漏。叫得做化學品嘅都唔慌冇毒o架啦，有毒物質苯酚洩到一地都係，部分經由公路排水溝以及亨渡河流入東江。
一提到東江兩個字，大家係咪已經睩大雙眼呢？冇錯嘞，鼎鼎大名嘅東江正正係香港人嘅飲水之源，如果大家飲水思源，一定會覺得好鬼死得人驚，東江受到有毒化學品污染呀！
龍川縣已經警告鄰近群眾，唔准喺亨渡河一帶取水飲用同捕魚，防止誤飲毒水或者誤食毒魚。功夫茶想問嘅係，香港人好唔好擰開水龍頭取水飲用呀？萬一飲咗來自東江嘅水，會唔會中毒o架？你知啦，苯酚嘅毒性足以致癌甚至致命o架！
講到東江受污染，今次都唔知係第幾次咯。幾個月前之嘛，東方報業集團記者去到東江源頭尋烏縣直擊報道，尋烏縣唔係位於廣東，而係位於江西。尋烏縣嘅情況就係，東江源頭沿岸堆積大量垃圾，塑膠袋呀，洗衣粉呀，化學肥料包裝袋呀，污糟邋遢見到都反胃。當地係就係有垃圾處理中心，亦有一個垃圾焚燒爐，不過竟然係無人操作嘅，原因係縣政府窮得冇錢請人開工。尋烏縣人均年收入少於二千三百元人民幣，屬於國家扶貧開發重點鄉鎮。
即係咁，香港一年花費三十五億元向廣東省政府購買東江水，再過兩年就要加到四十億，廣東省政府袋袋平安之後，居然冇補貼江西省政府，搞到尋烏縣冇錢做好保護水質工作，你話係咪荒謬吖？
講到呢度，功夫茶必須點醒剛剛上台嘅新政府，千祈唔好學似曾蔭權舊時，冇腰骨又冇膊頭。東江冇錯係由內地管轄，理論上香港無權過問，正所謂井水不犯河水，之但係身為一個消費者，點都有資格要求賣方改善貨物品質吖。簡單咁講，香港水務署其實有責任向廣東省政府施壓，未污染之前防止污染，有污染之後清除毒物，港產官僚絕對唔可以縮骨！
新官上任三把火，計功夫茶話齋，處理東江水係新政府發火立威嘅好機會，一於向廣東交涉啦，香港人唔想飲毒水呀，冇陰功！