政情：梁青華坐廂房睇歐國盃
啱啱落幕嘅歐洲國家盃，熱潮席捲全球萬億球迷。喜運佳鐘錶常務董事梁青華，好幸運獲邀免費到波蘭觀賽，由四強賽事睇到冠軍爭奪戰，唔使日夜顛倒睇電視。華哥越洋報料話，決戰日嘅廂房票價一票難求，被炒至一張近一萬歐元，即係約十萬港元，真係難以置信。歐債危機未過，唔通球迷睇波緊要過開飯？
華哥話，今次豪華全包宴由瑞士鐘錶名牌HUBLOT贊助，首站先去華沙睇四強賽，然後轉戰烏克蘭睇決賽，佢可以坐喺廂房欣賞賽事，真係令人羨慕。無賽事嘅時候，華哥就趁機遊波蘭，包括七十年前屠殺過百萬名猶太人嘅集中營。
華哥係意大利隊忠實擁躉，入場觀戰時好投入，唔止將意大利國旗彩繪喺面上，仲買咗唔少意大利隊嘅紀念品。雖然佢仍然身在歐洲，但不忘遙控喺香港馬會落重注，唔使講，梗係買意大利贏啦！