新政府班子尋日宣誓就任，當中包括咗被嘲為「史上最廢財爺」嘅鬍鬚曾，佢第一時間喺個人網誌上面講感受，話自己唔單止感到責任重大，甚至有啲面臨險境嘅感覺。佢講嘅「險」就係香港同環球嘅政治、經濟正面臨巨大變局，香港會受到好大衝擊，所以佢話要為前所未見嘅挑戰做好準備。第一日就職已經話面臨險境，作為普羅市民真係要自求多福喇。
鬍鬚曾有乜準備迎戰險境呢？佢話未來會提出三項工作重點，包括量入為出，應使得使；拓展經濟，改善民生同埋增推土地，平穩樓市。可惜呢三項工作都係老調重彈，其實係佢前五年任期內已經應該要做嘅，但結果係點？佢年年計錯數，派錢派到亂晒龍，屢次出招依然樓價高企，同埋以「狼來了」嚟遏低市民對派糖嘅期望，結果被市民鬧爆。
鬍鬚曾既然留低做財爺，就希望佢真心去做，如果佢再唔改吓拙劣嘅財政哲學同政治伎倆，睇怕會好似外界揣測，未必做得完未來五年任期。