政情：楊哲安離任做「城市獵人」
新政府上場，前朝多名正副局長及政治助理都要各散東西，佢哋其中一個就係前教育局政治助理楊哲安（Jeremy）。
Jeremy尋日凌晨就喺社交網站facebook（fb）留言，仲上載一張同太太張燊悅及兩個囡囡喺沙灘影嘅開心家庭照，多謝大家過去四年對佢嘅支持、批評和鼓勵，仲話今後佢喺fb嘅一切留言，已經唔再代表政府，純粹只係個人睇法。
Jeremy仲更新fb內有關僱主嘅資料，佢由今年八月開始會擔任獵頭公司Russell Reynolds Associates（羅盛諮詢）嘅執行董事，實行入商界搵真銀。有老友就留言笑佢做「城市獵人」，亦有人睇中佢對教育政策有一定認識，趁機問佢有無興趣合作搞電子課本。
另外，前勞工及福利局政治助理莫宜端亦留言，叫Jeremy無論做乜嘢崗位都要加油同做好自己喎。