政情：建制派自私 唔撐新架構
建制派同泛民喺民生議題南轅北轍，但一講到選舉，大家都係將選舉利益擺喺首位，最近又一例證。講緊嘅係新政府架構重組決議案，由於立法會今屆會期去到七月十八日就結束，如果會期前未能通過決議案，所有立法程序就要從頭嚟過，因而拖慢新政府工作展開。不過，有建制派唔想泛民主派借架構重組做政治彈藥，諗住勸諫特首梁振英（CY）暫時擱置五司十四局方案，避免影響九月立法會選情。
CY將政府重組成五司十四局，目前有待立法會大會及財委會撥款通過，兩項工作都要喺今個月十八日會期前搞掂，否則要等十月復會後先至可以重新啟動立法程序，分分鐘拖到明年二、三月至成事。由於目前主要只得人民力量拉布，所以能否喺十八日前通過，其實都好睇建制派有無幫手，但最近都見唔到建制派出招，一味由得人民力量玩拉布，據聞原來佢哋都唔係好想架構重組通過，希望拖得就拖。
目前建制派嘅如意算盤係，如果佢哋一早通過咗五司十四局方案，一旦CY班子因此而民望下滑，好可能拖累建制派喺九月嘅立法會選情，變相益咗泛民，所以有幾位建制派議員，曾經勸過CY唔好夾硬推架構重組方案，仲有人曾經叫CY撤回方案，有咩事到選舉結果塵埃落定時，再配合十月施政報告提出，以免建制派選情被拖累，講到尾都係為咗一己私利。
隨時拖到明年四月
不過，如果重組方案去到十月先至提出，咁樣一拖就起碼拖半年，令CY心目中嘅完美班底最快都要到明年四月先至正式上場，即係令到好多民生事務推行得未必咁好，受苦只會係平民百姓，到時CY做唔到嘢被市民批評，班建制派係咪會負責先？講到尾，選舉稱得上係政黨嘅照妖鏡。