中環出更：回歸盃拉頭馬發叔冇影

劉家拉頭馬，全家總動員出動，但偏偏唔見發叔。發嬸解釋話，老公有急事去咗沙田見朋友，幸好仔女致電報喜，即時笑逐顏開。

工展會擬調高參展費

尋日仲有廠商會嘅回歸紀念盃，會長施榮懷（Irons）率領一眾副會長包括顏吳餘英、徐炳光、展覽服務有限公司主席吳永嘉（Jimmy），加上一眾會董、青委及工展小姐，嘉賓多逾二百人，塞爆會場。

劉業強（前排中）興奮捧盃，太太（前排右）及媽媽發嬸（前排左）笑逐顏開。（溫國佳攝）

吳永嘉（右）為工展會勞心勞力，難得太太Esther好支持。

對於新特首梁振英一上任就話關注內地港商嘅發展，Irons聽見醒神晒，期待新班子有創新扶植措施，帶大家乘風破浪。

Jimmy就報喜話，康文署已初步批准該會於十二月十五日，繼續喺維園搞工展會。不過，咪開心得太早，由於今年政府要求租場費用同入場人數掛鈎，導致租金勢必大幅調升，連同保安、清潔、搭建攤位等費用亦加價至少百分之十。Jimmy話，佢哋唔想大幅加門券價格，惟有調高參展費。之不過羊毛出在羊身上，最終只有苦了升斗市民。

同場仲有剛獲頒銅紫荊星章嘅前會長黃友嘉，老友爭住恭賀佢三喜臨門，事關佢獲邀擔任土地及建設諮詢委員會主席，及經濟發展委員會籌備小組成員，加埋受勳，的確可喜可賀。

卓妮