年年回歸日，今年特別爽。點解？舊政府執包袱，新政府上場，香江第一貪官及第一庸官齊齊消失，想唔爽都幾難喇！
係人都知，香江第一貪官就係「貪遍省港澳，歎盡海陸空」嘅曾蔭權爵士，而第一庸官就非「每周一鑊」嘅周一嶽莫屬。呢對禍港殃民嘅官場孖寶一起消失，市民直情要開香檳慶祝喇，有人話今日係香港重光日，真係一啲都冇誇張。
呢，曾蔭權爵士尋日發表任內最後一封「家書」，話自己「離任在即，百感交集」喎。梗係啦，曾爵士飲英國人奶水長大，受港英政府培養，回歸後冷手執個熱煎堆，入主禮賓府，今次落台唔止係同特區政府告別，更加係同港英政府告別，同富豪朋友及私人飛機、私人遊艇告別，唔百感交集至奇。
至於周一嶽咯喎，大家都知佢雖然庸碌無能，但官癮極大，曾經多次厚住面皮暗示希望過渡新政府，點知最終眾望所歸無得留低，求官夢碎，又點止百感交集咁簡單吖！
周一嶽淪為過街老鼠，唔係無原因o架。佢做局長咁耐，市民就受罪咁耐，問題食品氾濫成災，前線醫護紛紛逃亡，醫療事故日日新鮮，雙非問題愈演愈烈，違規龕場遍地開花，港人生不起，病不起，老不起，死不起，都係多得佢咋。一句講晒，周一嶽係香江瘟神，早走早着。
不過咁喎，周一嶽做官渾渾噩噩，但係不務正業，充當港英餘孽嘅打手，迫害正義傳媒，打壓新聞自由，都唔知幾積極。嗱，東方報業集團為民喉舌，不斷踢爆港府施政亂象及貪官醜聞，被港府視為眼中釘，周一嶽就扮演打壓正義傳媒嘅急先鋒嘞。佢轄下嘅衞生署同食環署打孖上，藉口多多，針對性滋擾及恐嚇層出不窮，簡直係無所不用其極。唔怪得貪曾咁重用佢，縱容佢啦，講到底，佢哋根本就係一擔擔，講得文雅啲，叫做一丘之貉。
尋日胡錦濤主席落區期間，有記者因大聲發問被警方帶離查問，有人指警方打壓新聞自由喎。其實過去咁多年，東方報業集團被港府各部門輪番迫害，呢啲先至係真真正正嘅打壓新聞自由。正如全國政協委員劉夢熊話齋，曾蔭權政府借題發揮，用下三濫手段對付東方，簡直心理變態！
無論點都好啦，家陣貪官庸吏齊齊消失，香港人終於守得雲開見月明。正如老毛話齋：「借問瘟君欲何往，紙船明燭照天燒」。周一鑊，一路好走，睇住你隻鑊呀！