政情：陳克勤大手筆包起東鐵列車
立法會選舉臨近，一眾有意繼續連任嘅立法會議員無不大灑金錢做宣傳，有人買起的士、小巴賣廣告，而打算喺新界東競逐連任嘅民建聯陳克勤，就揀每日有過百萬搭客嘅港鐵東鐵線賣廣告宣傳，總共豪花十二萬元。由於仍未到選舉期，呢十二萬元完全唔使計入選舉經費，認真划算。
克勤話，佢買咗東鐵線三個火車站出口附近嘅巨型廣告牌，一個月盛惠六萬元，他又包起成架列車賣廣告，等搭車嘅市民可以見到佢個嘜頭，買起成架車身一個月同樣都係六萬元。
佢話呢筆宣傳費會由新界社團聯會找數，加上廣告內容無涉及選舉，所以唔使擔心要計入選舉開支。
克勤仲話，好彩可以夠快手買到廣告位，又話依家呢個價錢已經相當划算，臨近選舉一定仲貴喎。所以話呢，選舉一向都係有錢政黨嘅玩意，其他無錢嘅參選人就要諗啲較廉價嘅方法宣傳自己喇。